ابڙو اڪيڊمي Abro Academy
2020-07-19
داخلا نمبر 571
عنوان پياري، ڌوٻي، کٽي
شاخ پکي
پڙهيو ويو 361
داخلا جو حوالو:
پياري، ڌوٻي، کٽي
17.5 سينٽي ميٽر (7- انچ) جسامت واري ھن پکيءَ جي نر ماد جي رنگن ۾ فرق ٿئي ٿو. خود نَر جا کنڀ سياري اونھاري رنگ مٽائيندا آھن. ڌوٻيءَ جي پٺي سرمائي، پيٽ اڇو، مٿو ڪارو ۽ ڊگھو پُڇ سرمائي رنگ جو ٿئي ٿو. گلي ۾ ڄڻڪه ڪارو گلوبند پيل ھوندو اٿس پر سياري ۾ ڳچي اڇي ٿي ويندي اٿس. ٽنگون سنھڙيون، نازڪ ۽ ڪارڙيون ھونديون اٿس. چھنب ۽ اکيون به ڪارڙيون ٿينس ٿيون. حرڪت ۾ ڦڙت آھي، ھڪ ھنڌ آرام ڪونه ايندو اٿس. ھر وقت ڊوڙندو، بيھندو ۽ تيزيءَ سان اڏامندو نظر ايندو آھي. ڊگھو پڇ ھيٺ مٿي پيو ٿيندو اٿس. ان ريت اھو پنھنجو توازن برقرار رکندو آھي.
ڌوٻي پاڻيءَ ويجھو کليل ميدانن ۾ جيت ڳولي پيو کائيندو آھي. اڪثر عمارتن ۽ گھرن جي ويجھو رھندو آھي. پيالي جھڙو آکيرو ٺاھيندو آھي. ھي سٺي يوريشيا ۽ اتر آفريڪا ۾ ملي ٿو. محدود پئماني تي لڏپلاڻ به ڪندو آھي. ماحول : 7 جو پکي آھي.